पूर्वराष्ट्रपति विद्यादेवी भण्डारी नेकपा एमालेको सक्रिय राजनीतिमा फर्कने तयारीमा रहेको चर्चा सुरु भएसँगै राजनीतिक तरंग तीव्र भएको छ। विशेष गरी अध्यक्ष केपी शर्मा ओलीनिकट समूहमा यसबारे गम्भीर चासो र छलफल भइरहेको छ। एमालेका महासचिव शंकर पोखरेल लगायतका नेताहरू भण्डारीको सक्रिय राजनीतिमा पुनःआगमन उपयुक्त नहुने मतमा छन्। यही विषयलाई लिएर पार्टीको च्यासलस्थित केन्द्रीय कार्यालयमा बस्ने समूह र बाहिरी नेताहरूको अर्को समूहबीच विवाद र भनाभन चर्किएको छ।
बिहीबार बसेको जनसंगठन समन्वय संयन्त्रको बैठकमा महासचिव पोखरेलले विधान महाधिवेशन नभएसम्म पार्टीको नेतृत्वबारे बहस नगर्न स्पष्ट निर्देशन दिएका थिए। संयन्त्रका संयोजक भानुभक्त ढकालले त पार्टी निर्णयविरुद्ध जान खोज्नेहरूलाई ‘नोटिसमा राखिने’ चेतावनीसमेत दिएका छन्। यही विवादबीच एमाले सचिव योगेश भट्टराईले भने दुवै पक्षलाई संयमता अपनाउन आग्रह गरेका छन्।
‘च्यासललाई ललकार्ने, च्यासलबाट ललकार्ने- कृपया यो तरिका बन्द गरौं। बसौं, आपसमा विमर्श गरौं, सहकार्यमार्फत समाधान खोजौं। जबजको मर्म पनि यही हो। राष्ट्र, जनता र एमाले – हामी सबै एक ठाउँ उभिने आधार बनाऔँ, उनले भनेका छन् । पूर्वराष्ट्रपति भण्डारीले आधिकारिक रूपमा राजनीति फर्किने घोषणा नगरे पनि एमालेभित्र उनको सक्रियता र सम्भावित भूमिकाबारे बहस सुरु भइसकेको छ। आगामी दिनमा पार्टीको आन्तरिक सन्तुलन कता मोडिन्छ भन्ने चासो तीव्र बनेको सन्दर्भमा योगेशले संयमित हुन भनेका हुन् ।
