काठमाडौं । सार्वजनिक लेखा समितिका सभापति ऋषिकेश पोखरेलका पूर्व स्वकीय सचिव अनिल पोखरेल ठगीको आरोपमा पक्राउ परेका छन् ।
जिल्ला प्रहरी कार्यालय मोरङका प्रवक्ता डिएसपी वेदप्रकाश जोशीका अनुसार पोखरेललाई बिहीबार बिहान मोरङ जिल्ला प्रहरी कार्यालय नजिकैबाट प्रहरीले नियन्त्रणमा लिएको हो । पोखरेललाई नियन्त्रणमा लिएर अनुसन्धान प्रक्रिया सुरु भइसकेको छ ।
पोखरेलमाथी एमबीबीएस पढ्न नाम निकालिदिने भन्दै ३८ लाख ८० हजार रुपैयाँ ठगी गरेको आरोप छ । उनीमाथि अनुसन्धान गर्न उच्च अदालत विराटनगरले निर्देशन दिएको थियो । ठगीको आरोप लागेसँगै सभापति पोखरेलका स्वकीय सचिवको जिम्मेवारीबाट पोखरेललाई हटाइएको छ ।
सभापति पोखरेलकी पत्नी अञ्जला कोइरालामाथि पनि सहकारी ठगीको आरोप लागिसकेको छ । मुद्दा दर्तापछि फरार रहेकी उनी बुधबार अदालतमा हाजिर भएकी थिइन् । अदालतको आदेशअनुसार १० लाख रुपैयाँ धरौटी बुझाएर उनी छुटेकी हुन् ।
