२३ माघ २०८०, काठमाडौँ । नेपाल टेलिकमको प्रबन्ध निर्देशक संगीता पहाडी अर्यालले कम्पनीका सेवाहरूलाई अविछिन्न रूपमा गुणस्तर कायम राख्दै आएको बताएकी छिन्।
नेपाल टेलिकमको २० औं वार्षिकोत्सवको अवसरमा बोल्दै उनले विभिन्न समयमा आइपरेका बाधा, अड्चन र कठिन परिस्थितिको समयमा पनि कम्पनीले गुणस्तर कायम गरेको बताएकी हुन्।
हाल टेलिकमले ७७ वटै जिल्लामा ताररहित फोरजी एलटिई प्रविधिमा आधारित मोबाइल र डेटा सर्भिस तथा ७४ जिल्लामा अप्टिकल फाइबरमा आधारित एफटिटिएच सेवा सञ्चालनमा ल्याएको छ।
हाल कम्पनीमा दुई करोड १८ लाखभन्दा बढी ग्राहक र मुलुकको अधिकांश भूभागमा नेपाल टेलिकमको कुनै न कुनै सेवाको पहुँच पुगिसकेको जानकारी प्रबन्ध निर्देशक अर्यालले दिइन्।
