काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई थप पाँच दिन हिरासतमा राख्न अनुमति दिएको छ । बिहीबार कास्की जिल्ला अदालतले प्रहरीलाई अनुसन्धानका लागि थप पाँच दिनको समय दिएको हो ।
यसअघि छैटौँपटक थपिएको म्याद बुधबार सकिएको थियो । बिहीबार सातौँपटक म्याद थपका लागि उनलाई अदालतमा पेस गरिएको हो । रविसहित छविलाल जोशी, लिला पछाईं र रामबहादुर खनाललाई पनि पाँच दिन हिरासतमा राख्न अदालतले अनुमति दिएको छ ।
गत कात्तिक २ गते काठमाडौंबाट पक्राउ पुर्व उपप्रधान तथा गृह मन्त्री लामिछाने विरुद्ध कास्की प्रहरीले सहकारी ठगी, संगठित अपराध र सम्पत्ति सुदृढीकरण मुद्दामा अनुसन्धान गरिरहेको छ । लामिछानेलाई कास्की प्रहरी हिरासतमै रहेका बेला बुटवल, काठमाडौँ र चितवनमा बयानका लागि लगिएको थियो । बुधबार मात्र रविलाई पर्सामा बयान सकेर काठमाडौं हुँदै पोखरा लगिएको थियो ।
