एजेन्सी । सिकागोमा एउटा नाइटक्लब बाहिर गोलाबारी हुँदा कम्तीमा चार जनाको मृत्यु भएको छ । यस घटनामा अरू १४ जना घाइते भएको प्रहरीले बताएको छ ।
बुधबार स्थानीय समय अनुसार राति ११ बजे क्लब नजिकैबाट एउटा गाढा रङ्गको कार गुज्रिएको थियो । सोही कारमा सवार रहेका बन्दुकधारीहरूले बाहिर उपस्थित मानिसहरूमाथि जथाभाबी गोली चलाएको शिकागो प्रहरीले भनेको छ ।
बीबीसीको अमेरिकी सम्बद्ध सीबीएस न्यूजका अनुसार, र्यापर मेलो बक्जको एल्बम रिलिज पार्टीपछि नाइटक्लबबाट मानिसहरूको भीड बाहिर निस्किरहेको थियो । प्रहरीले गाडी तुरुन्तै घटनास्थलबाट भागेको बताएको छ ।
यस घटनामा अहिलेसम्म कसैलाई पनि हिरासतमा लिएको छैन । गोलीबारीबाट घाइते भएकाहरूलाई विभिन्न अस्पतालमा लगेर उपचार गरिदैँछ ।
यस घटनामा २४ र २५ वर्षका दुई पुरुष र २६ र २७ वर्षका दुई महिलाको मृत्यु भएको प्रहरीले जनाएको छ । अस्पतालमा भर्ना भएका कम्तीमा चार जनाको अवस्था गम्भीर रहेको बताइएको छ । गोलीबारीबाट घाइते र मृत्यु भएकाहरूको पहिचान अझै खुलाइएको छैन ।
