नेपाल शाकाहारी संघले आयोजना गर्न लागेको ‘अहिंसा महोत्सव नेपाल’ (अहिंसा फेस्टिभल नेपाल) को तयारी पूरा भएको छ। महोत्सव आउँदो बिहीबार (भदौ १२) देखि शनिवार (भदौ १४) गते, तदनुसार अगस्ट २८ देखि ३० सम्म काठमाडौँमा हुँदैछ। तीन दिने महोत्सवका सबै कार्यक्रम काठमाडौँको भृकुटीमण्डप, प्रदर्शनीमार्गस्थित नेपाल पुलिस क्लबमा हुनेछन्।
महोत्सवमा सबैका लागि निःशुल्क प्रवेशको व्यवस्था छ। महोत्सवको नारा ‘करुणाले जोड्छ’ भन्ने रहेको छ। पशुपक्षी प्रेम, मानव स्वास्थ्यको ख्याल, पृथ्वी/वातावरणको हितका लागि ‘पूर्ण शाकाहारी’ जीवनशैली प्रवर्द्धनार्थ यो कार्यक्रम आयोजना गर्न लागिएको हो।
महोत्सवले अहिंसाका मूल्य र शाकाहारी जीवनशैलीमा रुचि राख्ने पशुमुक्ति अभियन्ता, सङ्घसंस्था र समुदायलाई जोड्ने अपेक्षा राखेका छौँ। कार्यक्रमका प्रमुख आकर्षणमा दिगो जीवन पद्धति, शाकाहारी जीवनशैली र पशु अधिकारसम्बन्धी अन्तरक्रिया रहनेछन्। त्यस्तै, कार्यक्रममा भरतनाट्यम नृत्यलगायत साङ्गीतिक प्रस्तुति; योग सत्र; देशविदेशका अभियन्तासँग प्रत्यक्ष भेटघाट र अनुभव आदानप्रदान; शाकाहारी परिकार तथा पकाउने विधिको प्रदर्शन र विशेष रात्रिभोज रहनेछन्। महोत्सवमा पूर्ण शाकाहारी (भिगन) खानाहरूको समेत स्टल रहनेछन्। केही स्टलमा निःशुल्क रूपमा खाना भिगन खाना चाख्ने स्किम पनि रहनेछन्।
महोत्सवमा ५० हजारभन्दा बढी दर्शकको उपस्थिति रहने हामीले अनुमान गरेका छौँ। त्यस्तै, महोत्सवमा खानालगायत शाकाहारी उत्पादनका ६० भन्दा बढी कक्ष, ४० भन्दा बढी वक्ता र २० भन्दा बढी सहभागी संस्था रहनेछन्। जसमा अन्तर्राष्ट्रिय वक्ताहरूसमेत रहनेछन्। सङ्घले २०७४ सालमा पनि काठमाडौँमा ३५ भन्दा बढी अन्तर्राष्ट्रिय प्रतिनिधिको सहभागितामा आठौँ एसिया-प्यासिफिक भेजिटेरियन कांग्रेस (एपिभिसी) सफलतापूर्वक आयोजना गरेको थियो। शाकाहार र अहिंसा प्रवर्द्धनको क्षेत्रमा संघ झन्डै दुई दशकयता नेपालभित्र अनेकन् गतिविधिमा क्रियाशील छ।
कार्यक्रमका सहआयोजकमा काठमाडौँ एनिमल सेभ मुभमेन्ट, समस्त महाजन, श्रीकृष्ण प्रणामी समाज, वर्ल्ड भिजन अर्गनाइजेसन रहेका छन्। हाम्रा प्रायोजकमा वर्ल्ड भिगन भिजन र म्याजिक मार्बल फाउन्डेसन रहेका छन्। यसै प्रेस नोटमार्फत हामी सबैमा कार्यक्रममा स्वागत गर्न चाहन्छौँ।
