काठमाडौं । दृष्टिविहीन राजेश कुमार अर्यालले आफूले सगरमाथा आरोहण गर्ने बताएका छन् । आज (बुधबार) रिपोर्टर्स क्लब नेपालमा पत्रकार सम्मेलन गर्दैै उनले ‘दीगो पर्यटन, शान्ति, सम्वृदि र वातावरणका लागि दृष्टिसम्बन्धी अपाङ्गता भएका व्यक्तिको सगरमाथा आरोहण-२०२६’ नारासहित सगरमाथा आरोहण गर्ने बताएका हुन् ।
दाङको तुलसीपुर उपमहानगरपालिका–४ स्थायी घर भएका अर्याल २०७६ सालदेखि सल्यानमा प्रा.वि तृतीय श्रेणी शिक्षक पदमा कार्यरत छन् । अर्यालले सगरमाथा आरोहण गर्ने तयारी भइरहेको बताए ।
दृष्टिविहिन शिक्षक अर्यालको सगरमाथा आरोहण सफल पार्नका लागि सहयोग संकलन गर्ने समिति पनि बनाइएको छ । उक्त समितिले संकलन गरेको रकम ग्लोबल्ली कन्सर्न सेन्टर फर क्लाइमेट चेन्ज (जीफोरसी) को बैंक खातामा जम्मा हुने बताइएको छ ।
जीफोरसीले लामो समयदेखि जलवायु परिवर्तन र हिमाल बचाउसम्बन्धि काम गर्दै आएको छ । अर्यालको सगरमाथा आरोहणको सम्पूर्ण व्यवस्थापन प्रकृति संरक्षण अभियन्ता तथा सगरमाथा आरोही पिके शेर्पाले गर्नेछन् । अरोहणको मिडिया व्यवस्थापन भक्सपप नेपाल र प्राईम टेलिभिजन गर्नेछन् ।
अर्यालले सगरमाथा अरोहणको तयारी गत वर्ष पनि गरेका थिए । तर, समय अभावका कारण गत वर्ष काम अगाडि बढ्न सकेन । उक्त अभियानका लागि गत आर्थिक वर्षमा इन्द्रेणीलगायतका केही संस्था तथा व्यक्तिहरूले सहयोग पनि गरेका थिए । उक्त सहयोग रकमसहित यो वर्ष अभियान शुरू गरिने बताइएको छ ।
अरोहणका लागि मार्च अन्तिम साताको समय तोकिएको छ । त्यसको तयारीका लागि नोभेम्बरमा ६ हजार मिटरभन्दा माथिको सानो हिमाल चढ्नुपर्नेछ । कार्यक्रमलाई सम्बोधन गर्दै अर्यालले सगरमाथा आरोहणका लागि साथ, सहयोग र समर्थनको लागि आग्रह गरे ।
‘तपाईँहरुको साथ, सहयोग र समर्थन रह्यो भने पक्कै पनि म २०२६ मा सफल सगरमाथा आरोही बन्नेछु । व्यक्तिभन्दा पनि व्यक्तिभित्र रहेको आँट त्यहाँ चढ्ने हो । त्यो आँटले व्यक्तिलाई लग्ने हो । म चाहिँ त्यो आँट गर्न सक्छु र सफल आरोही भएर फर्किन्छु भन्ने मलाई लाग्छ,’– उनले भने ।
आफूलाई सगरमाथा आरोहण गर्न झण्डै एक करोड खर्च लाग्ने उनले बताए । स्वस्थ्य व्यक्तिलाई लाग्ने समय र आफूलाई सगरमाथा चढ्न लाग्ने समय फरक हुने पनि उनले बताए ।
