काठमाडौं । काठमाडौं महानगरपालिकाको वातावरण व्यवस्थापन विभागले खुला ठाउँमा प्लास्टिक, प्लास्टिकजन्य बस्तु र फोहर बाल्न रोक लगाएको छ ।
चिसो बढेसँगै फोहर, प्लास्टिक र अन्य बस्तु खुला ठाउँमा बाल्ने क्रम बढेकाले यस्ता बस्तु बाल्न रोक लगाइएको हो । जाडो महिनामा काठमाडौँ उपत्यकाको वायु प्रदूषणको स्तर अत्यधिक रूपमा बढ्ने गरेको छ । जसको प्रमुख कारण मध्ये यसरी खुला रूपमा बालिने प्लास्टिकजन्य वस्तु पनि रहेको विभागले जनाएको छ ।
विभागका प्रमुख सरिता राईले भनिन् ‘जनस्वास्थ्य र वातावरणमा पर्ने प्रतिकुल असर घटाउन यस प्रकारको निर्णय गरिएको हो ।’ वायु प्रदूषणले बालबालिका, ज्येष्ठ नागरिक, दम खोकी जस्ता श्वासप्रश्वासका बिरामी, मुटुमा समस्या भएका तथा दीर्घ रोगको सामना गरिरहेका व्यक्तिहरूलाई बढी असर गर्छ ।
ती व्यक्तिहरूसँगै सहरबासी सबैको स्वास्थ्य र वातावरण जोगाउन खुला रूपमा बस्तु बालेर धुँवा उत्सर्जन घटाउनुपर्छ । महानगरपालिकाले जारी गरेको प्रतिबन्ध सम्बन्धी अनुरोध कसैले अटेर गरेमा काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७ तथा आर्थिक ऐन, २०८२ बमोजिम कारबाही हुनेछ विभागद्वारा जारी सूचनामा भनिएको छ । यस व्यवस्था बमोजिम कसैले सूचनाको अटेर गरी प्लास्टिकजन्य वस्तुहरू बालेको पाइएमा प्रति पटक १० हजार रुपियाँ जरिवाना हुने महानगरले जनाएको छ ।
प्रतिक्रिया दिनुहोस